ந(க)டப்பு…?!

ந(க)டப்பு…?!

மழையின் தூற(வ)லை அனுபவியுங்கள்;

வெற்றாய் நனைந்து திரும்பாதீர்கள்.

உணவின் சுவையிலே மயங்குங்கள்;

வயிற்றை மட்டுமே நிரப்பாதீர்கள்.

கவினுறு காட்சிகளை ரசியுங்கள்;

சி(நி)ந்தனையில் ஊறி ந(க)டக்காதீர்கள்.

தென்றலை உணர்ந்து தழுவுங்கள்;

காற்றாய் நினைத்து நழுவாதீர்கள்.

எதிரே கண்டால் புன்னகையுங்கள்;

புதிரென நினைத்து கடக்காதீர்கள்!

பணத்தை மட்டுமே ‘எண்ணா’தீர்கள்…

மனத்தை பற்றியும் நினையுங்கள்.

வாழ்க்கையை சுகித்து வாழுங்கள்

நாட்களை மட்டும் ந(க)டத்தாதீர்கள்!

எம்.ஜி.ஆர்...

(பட உதவி : நன்றி கூகிள்)

(முதல் அடி எடுத்துக் கொடுத்த பாப் மார்லிக்கு நன்றி)

உலைக்களம்!

உலைக்களம்!

வறுமை எனும் கொடுமை-

வயிற்றினில் தீ எரிக்க

துள்ளியோடும் சிறுவயதில்

பள்ளிக்கூடம் நீ சென்று

பாடங்கள் படித்தறிய-

முடியாத உன் சோகம்?

இரும்பென அசையாத

இதயம் கொண்டிருந்தால்

அனுபவப் பாடந்தரும்

வாழ்க்கை உலைக்களம்

புடம்போட்ட தங்கமென

உன்னை - ஒளிரச்செய்யும்;

நிரந்தரப் புன்னகையில்

முகம் மிளிரச் செய்யும்!

ரவிஜி---

(புகைப்படம் – நன்றி கூகிள்)

பயணமும் மயக்கமும்!

பயணமும் மயக்கமும்!

பால் நிலவுப் பனி இரவில்

நெடிய பயணம் நிமித்தமாய்

என் கிராமத்து நிறுத்ததில்

ஒரு கொடிய காத்திருத்தல்!

தென்றலின் தண் தீண்டலில்

சிலிர்த்தோடும் பச்சை வயல்;

முழு நிலவின் ஒளிவீச்சில்

தென்னங்கீற்றும் பளபளக்கும்!

சாலையோரப் புதரினுள்

பின்னிசையாய் ரீங்கரிக்கும்

குறும்புச் சில் வண்டுகள்;

சலனமற்ற சாலைமேல்

காளைகள் பாரமிழுத்து

குளம்புகளால் தாளமிடும்;

என்னெதிரே நிமிர்ந்திருக்கும்

மின்மினிகள் அரும்பிட்ட

சாலையோரத்து நெடுமரம்.

அருகாமைத் தோப்பினுள்ளே

ஜோடியைத் தெடி அலையும்

கானல் வரிக் குயிலோசை;

சூழ்நிலையின் சுகம் கண்டு

நிலையில்லா குரங்கு மனம்

பயணத்தை கணம் மறக்கும்;

திருப்பத்தில் உரத்தொலிக்கும்

என் பேருந்தின் குழலோசை

மன மயக்கத்தைத் தீர்க்கும்!

ரவிஜி…

(புகைப்படம் : நன்றி கூகிள்)